السنترلوك!:صالح الحمداني

2018/10/17 06:14:55 م    
السنترلوك!:صالح الحمداني

صالح الحمداني

 

 

الحمد لله، مو بس آنا إنباگت سنوية سيارتي من باب بيتي، جيراني أبو محمد هم إنباگت سنويته من سيارته وهي واگفه بباب بيته!

والحمد لله خفّت عليّه ملامة: "ليش عايف سيارتك مفتوحة، وليش ما حاط كاميرات بالبيت"!

فأبو محمد عنده كاميرات سرية وعلنية، وقافل سيارته، ورغم ذلك فضباط الشرطة عافوا سالفة البوگ المتسلسل للسنويات، اللي إنتشر بشكل واسع بمدينة كربلاء، وعافوا رفع البصمات، وعافوا كلشي وچلبوا بشغلة:

 ⁃ السنترلوك مستحيل ينفتح!

أبو وصفي جيرانه أكثر واحد زرف گلوبنه، وعنده تلث فقرات يلومنه بيها، بينما الجميع يلومونه فقط على النقطتين المذكورتين في آنفاً: قفل السيارة والكاميرات!

أبو وصفي يگول :

 ⁃ المفروض تصيرون أذكياء وحذرين ومو فاهين وتدخلون سياراتكم بالبيت مثلي!

اليوم العصر أريد أروح للامام الكاظم (ع) باب الحوائج، أدعي بلكت أبو وصفي يكسرون الجامه اللي بصف السايق مالت سيارته، ويكسرون الچكمچه، وما يطلع شي بالكاميرا لأن الحرامي مغطي وجهه، وياكلها مدبسه، ومن يروح يشتكي يگلوله الشرطة:

 ⁃ أكو واحد يخلي السنوية بالسيارة؟ غير تخليها بجيبك؟

ومن يگللهم:

 ⁃ مو آني سيارتي رقمها شمالي، وسنويتها چبيرة!

يگلوله:

 ⁃ أخي إطبگها، وخليها بالمحفظة!

وبعدين يروح مثلنا يسوي معاملة مالت "بدل ضايع"، لأن:

   - شغلة السرقة ومكافحة الاجرام طويلة، وما توصلكم نتيجه!

والعصريات من نطلع نرشرش بالشجر، نشبع أنا وأبو محمد مغامز وضحك على ابو وصفي!

وين باب الحوائج..

في أمان الله