صالح الحمداني:

2018/10/28 06:53:04 م    
صالح الحمداني:

حكومة إسْبيعيّة!
 

 
 ⁃ شدعوه يا ملا مشكور؟ ربعكم البارحه لعبوا لعب بالمجلس!
 ⁃ چا شحسبالك؟! هو لعب إچعاب؟! 
 ⁃ الفاظك كلش سياسية ملا، إنت خريج (السربرون)؟!
 ⁃ (السربرون) خليناها إلك ولربعك البايهين!
 ⁃ آنا تدري بيه، لا عندي ربع، ولا أشتري أحد بزبانه، ومقاطع الانتخابات!
 ⁃ مقاطع هو! بهههاي بهههاي، عود هو مثقف، ما تلبسلك (كوباي) وتحطلك چومة مفاتيح بحزامك، وتروح الجمعه للمتنبي، وي ذوله أهل الزلوف والذيل حصان؟!
 ⁃ أهل الزلوف ذوله ربعك، وصاحبكم متحالف وياهم، وعلى يوم يگللكم لبسوا مثلهم قمصان حمر، شلون بيك؟ تصبغ دشداشتك؟!
 ⁃ تتنكت حجي منخي، وروح أبوك لو يگلنه ذبوا روحكم بالنار نذبها!
 ⁃ أدري بيكم مخابيل، وكلشي تسوون، بس شني؟ ما متفقين وي سيد عادل؟ لو هاي مسرحية مُلاّنا؟!
 ⁃ إنت شتگول، يا هيكل؟!
 ⁃ أگول مسرحية، وطيرتوا الداخليه من الجماعه، وعاقبتوا المنشقين عنكم !
 ⁃ وخلصنا سيد عادل من المايريدهم بغير ما يوسخ إيده!
 ⁃ فنانين صايرين، من صفيتوا وي أهل الزلوف!
 ⁃ أهل الزلوف ذوله عراقيين ووطنيين، وكل حٓرْمٓنَه، وبوگ ما عدهم!
 ⁃ ما كاظين سلطه مُلا، ولاّ چان لعبوا لعب، مثل ربعكم الاشتروا نص الكاظميه بفلوسنا!
 ⁃ كظوا، وما باگوا، وإحنا اليبوگ عدنه نكسر ظهره!
 ⁃ يعني ذوله التارسين الشوارع وظهورهم مكسره، إنتم كاسرينها؟!
 ⁃ حجي منخي؟!
 ⁃ ها ملا ؟! تهددني؟!
 ⁃ لا تلوي عنق الحقيقة وتكيل بمكيالين!
 ⁃ أووو، غير يگعد طارق حرب!
 ⁃ شوف حجي.. إخذ زلم شكلت حكومة بأقل من شهر!
 ⁃ حكومة إسبيعية، حاطينها بالخدج من البارحه!
 ⁃ إنت ظل قلد، ظلن سبع إثمن وزارات ورا الزياره نكملهن!
 ⁃ وإذا ما صوتوا عليهن بالمجلس؟!
 ⁃ يصوتون بالكرته!
 ⁃ أنا أخو الملا!
 ⁃ چا شحسبالك؟ هاي معركة، معركة وطن، موش لعب چعاب!
 ⁃ أُممممْ
 ⁃ نعـــــــم !
 
في أمان الله